நாமும் அறிந்து கொள்ளலாமே கைசிக புராணத்தை
_____________________________
வரும் 30.11.17 வியாழன்று திருக்குறுங்குடி சுவாமி அழகியநம்பிராயர் கோவிலில் இரவு கைசிக புராண நாடகம் நடைபெற இருக்கின்றது,பக்தகோடிகள் கண்டு களித்து பெருமாளின் திருவருளை பெறுங்கள்
கைசிக புராண வரலாறு
++++++++++++++++++++
நம்பாடுவான் என்பான் இத்தலத்திற்கு அருகே ஒரு கிராமத்தில் வசித்தான். தினமும் அதிகாலையில் நீராடிவிட்டு, திருக்குறுங்குடி பெருமானைப் பலவாறு பண்ணிசைத்துப் பாடி மகிழ்ந்தான். கார்த்திகை மாதம் சுக்ல பட்ச ஏகாதசியன்று கோவிலுக்கு சென்றபொழுது, ஒரு பிரம்ம ராட்சசன் அவனைத் தடுத்து, “ நீ எனக்கு உணவாக வேண்டும்” என்றான். அவனோ நான் பெருமாளை வழிபட்டு வந்த பின் உனக்கு உணவாகிறேன் என்றான். பிரம்ம ராட்சசன் அதை நம்பவில்லை. நம்பாடுவான் பல விதமான சத்தியம் செய்தபோதும் பிரம்ம ராட்சசன் நம்பவில்லை. இறுதியாக, நம்பாடுவான் கீழ்க்கண்ட வாறு சத்தியம் செய்தான்.
நான் திரும்ப வராவிட்டால், “எவன் ஒருவன், பரம்பொருளான ஸ்ரீமன் நாராயணனுக்கு ஈடாக மற்றொரு தெய்வத்தை நினைப்பானோ, அவன் அடையும் துர்க்கதியை நானும் அடையக் கடவேன்” என்றான். இந்த வார்த்தைகளைக் கேட்டவுடன், பிரம்ம ராட்சசன் நம்பாடுவான் நம்பியைச் சேவித்து சீக்கிரம் வருமாறு பணித்தான்.
நம்பாடுவான் கைசிகப் பண்ணை இசைத்து நம்பியைப் பாடிய போது, கொடிமரம் சற்று விலகி எம்பெருமானின் தரிசனம் கிடைக்கப் பெற்றான். பிறகு, தான் சத்தியம் செய்தபடி பிரம்ம ராட்சசனை நோக்கி சென்றபோது, நம்பியே ஒரு முதியவராக தோன்றி அவனை வழிமறித்து, பிரம்ம ராட்சசனின் பசிக்கு இரையாகாமல் வேறு வழி செல்லுமாறு கூறினார். ஆனால், சத்திய விரதனான நம்பாடுவான் அதை மறுத்து, வாக்களித்தபடி பிரம்ம ராட்சசனை நோக்கிச் சென்றான்.
பிரம்ம ராட்சசனுக்கு மீட்சி
நம்பாடுவானின் நேர்மையால் மகிழ்ந்த பிரம்ம ராட்சசன்,” நீ பெருமானை நோக்கிப் பாடிய பாடல்களின் பலனை எனக்கு கொடுத்தால், உன்னை விட்டுவிடுகிறேன்” என்றான். நம்பாடுவான் ராட்சசனை நோக்கி, நான் சத்தியம் செய்தபடி தவறாமல் வந்துவிட்டேன். நீ என்னை ஆகாரமாக்கிவிடு. அழகிய நம்பியைப் பாடிய பலனைத் தர முடியாது என்றான். அப்பொழுது பிரம்ம ராட்சசன், நீ நம்பியைப் பாடிய பலத்தில் கால் பாகமாவது தந்து என்னை இந்த ராட்சச ஜன்மத்தில் இருந்து கரையேற்ற வேண்டும் என்று கண்ணீர் மல்கச் சரணடைந்தான். அந்த ராட்சசனை அன்புடன் அணைத்த நம்பாடுவான், “நீ எப்படி இவ்வாறு மாறினாய்?” என்று கேட்க, பிரம்ம ராட்சசன் தனது கதையைக் கூறினான்.
“நான் சரக கோத்திரத்தைச் சேர்ந்த ஸோம சர்மா. ஒரு யக்ஞத்தைத் தவறாகச் செய்து, அது முடிவதற்குள் இறந்துவிட்டதால், இவ்வாறு அலைகிறேன்” என்றது. மேலும், உனது தரிசனத்தாலும், ஸ்பரிசத்தாலும், எனக்கு முன் ஜன்ம ஞானம் உண்டானது என்றும் கூறியது.
நம்பாடுவானும் அழகிய நம்பியைக் கைசிகம் என்ற பண்ணினால் பாடின பலனைத் தர, ராட்சசன் சுய உருவம் பெற்றான். இந்தப் புராணம் திருக்குறுங்குடியில் பிரதி வருடம் கைசிக ஏகாதசியன்று நம்பாடுவான் சரித்திர நாடகமாக நடத்தப்படுகிறது. இதில் நம்பாடுவான், பிரம்ம ராட்சசன், நம்பிக் கிழவன் ஆகிய மூன்று பாத்திரங் களே நடிப்பர். நடிப்பவர்கள் 10 நாட்கள் விரதம் அனுஷ்டிக்கிறார்கள். விரதம் அனுஷ்டிக்காமல் வேஷம் பூண்டால் அவர்களுக்குக் கெடுதல் வருகிறது என்றும் சொல்லப்படுகிறது.
இந்த புராணத்திலிருந்து, நாம் தெரிந்துகொள்வது என்னவென்றால் விஷ்ணு பக்தனான ஒருவரின் தரிசனத் தாலும், ஸ்பரிசத்தாலும் எம்பெருமான் அருளுக்குப் பாத்திரமாகி, வீடுபேறு அடையலாம் என்ற உண்மை காட்டப்படுகிறது.
நாமும் திருக்குறுங்குடிச் நம்பியை சேவித்து, நம்பாடுவான் பெற்ற பேற்றை பெறுவோமாக!
